Fadri Guidon daventa a partir da l’emprim da favrer rectur a la scola media da l’Academia Engiadina a Samedan. Cunquai succeda el a Thomas Bächer che banduna la scola la fin da schaner.
Guidon lavura dapi passa 25 onns tar l’Academia Engiadina, quai sco docent a la scola spezialisada superiura da turissem e sco magister per informatica e biologia a la scola media. Tras sia lunga experientscha enconuschia il Beverot precis la scola e ses basegns, scrivan ils responsabels en lur communicaziun.
Sper l’uffizi sco rectur resta Fadri Guidon vinavant magister a la scola media, quai en in pensum parzial. Er a ses uffizi accessoric sco president communal da la vischnanca da Bever resta el fidaivel. La fin da settember era Guidon vegni reelegì sco president communal per sia terza perioda d’uffizi.
