Ils ultims mais saja il cussegl d'administraziun stà en contact intensiv cun la direcziun da l'Academia Engiadina. En il center da las discussiun saja stà la direcziun operativa ed era dumondas strategicas. Tenor communitgà sajan qua sa mussadas differenzas, uschia ch'ins saja sa cunvegnì cun il directur Matthias Steiger da sa separar. Ina cunvegnientscha vicendaivla, puntuescha il Cussegl d'administraziun en ses communitgà.
Cussegl d'administraziun e CEO han cuntanschì bler ils ultims onns – ensemen cun ina squadra da manar motivada; questa lavur vulain continuar cun novas forzas.
Matthias Steiger è stà CEO dapi il 2013 ed haja gidà a sviluppar l'Academia cun scolaziun en il sectur turistic, engrazia il cussegl d'administraziun.
Evaluar ed adattar la structura
Gia avant aveva l'Academia publitgà ch'il rectur da la scola media Ueli Hartwig bandunia la scola e giaja en pensiun sin la fin da l'onn da scola 2019/2020. Uschia annunzia il cussegl d'administraziun d'evaluar la structura da manar e prender las decisiuns persunalas necessarias.
Ad interim maina il vice-president e delegà dal cussegl d'administraziun Thomas Malgiaritta las fatschentas da l'Academia Engiadina e da la scola auta per turissem Grischun.
RR novitads 14:00