Puspè ina midada a la testa da l’Academia Engiadina: Duas emnas, suenter che la scola è sa separada da ses CEO Matthias Steiger, banduna uss er la presidenta dal cussegl d’administraziun l’Academia Engiadina.
Academia aveva annunzià dad analisar las structuras
Cun l’annunzia da la separaziun da Matthias Steiger ils 27 d'october aveva la scola er annunzià da vulair prender sut la marella la structura da manar da la scola media. Gia quella giada n’aveva l'Academia Engiadina betg exclus, ch’i seguissan anc ulteriuras midadas persunalas.
Discussiuns intensivas dapi mais
En la medema communicaziun era vegnì fatg a savair, ch'il cussegl d'admini-straziun e la direcziun da l'Academia Engiadina hajan discutà ils ultims mais intensivamain.
En il center da las discussiun sajan stadas la direcziun operativa ed er dumondas strategicas. Pervi da differenzas, che sajan sa mussadas en quellas discussiuns, saja la scola sa cunvegnida cun il directur Matthias Steiger da sa separar.
«Cuntinuar cun novas forzas»
Il cussegl d’administraziun ed il CEO Steiger hajan cuntanschì bler ensemen cun ina squadra motivada e «questa lavur vulain cuntinuar cun novas forzas» – uschia aveva sa laschà citar quella giada Annemarie Perl sco presidenta dal cussegl d’administraziun.
Questa funcziun bandunia ella ussa per immediat, scriva la Posta Ladina.
RR novitads 20:00