Vers las 14.30 è in auto da persunas che charrava sin la via chantunala da San Murezzan en direcziun Champfèr collidà frontalmain cun in bus. «La dunna da 68 onns che manava l’auto è morta anc en il lieu», ha ditg Roman Rüegg, pledader da la polizia chantunala grischuna ad RTR.
«Il manischunz dal bus d’Engiadina è vegnì blessà mez grev tar la ferma collisiun. El è vegnì transportà cun l’ambulanza en l’ospital a Samedan», agiunta Rüegg. Era trais dals radund 20 passagiers dal bus sajan vegnids blessads: quai dentant be lev, uschia ch’els han pudì vegnir tractads da l’equipa da l’ambulanza al lieu.
Raschun betg anc clera
Daco che la dunna è vegnida cun ses auto sin il vial oppost, en la curva sanestra tar il magazin da pumpiers, na sa la polizia betg anc dir. Cler è be che «la via era, cura che l’accident è capità, per gronda part bletscha, dentant betg schelada», uschia il pledader Roman Rüegg. Ensemen cun la procura publica dal Grischun examinescha la polizia chantunala ussa co precis che l’accident frontal è capità.
Pliras uras stà serrà
En consequenza da l'accident ha la polizia stuì serrar la via chantunala tranter San Murezzan e Champfèr per pliras uras. Fin la saira è il traffic vegnì svià sur Champfèr.
RR novitads 16:00++