Las infurmaziuns chatt'ins integrà sin la carta interactiva da la destinaziun da turissem Engiadina San Murezzan.
Finamira saja tenor Gian Clalüna, responsabel per las alps sin territori da Segl da infurmar ils viandants ed uschè pussibilitar ina meglra schelta tge tura ch'ins vul far. La decisiun sch'ins va sin ina senda nua che vatgas mamma sa chattan e las sendas èn betg separadas d'ina saiv, quella responsabladad restia tar mintgin sez.
La carta mussa sendas sin tut il territori turistic. Numnadamain da la Bregaglia fin Zernez.
Custs da totalmain 40'000 francs
Carta interactiva
Quests duain vegnir repartids sin las vischnancas Bregaglia fin Zernez. Las vischnancas Puntraschigna, Bever e Zuoz èn tenor Gian Clalüna betg prontas da pajar lur part. Malgrà quai han ins realisà il project e speria che las opiniuns sa midan. Ins dastgia betg desister sin la prevenziun perquai che betg tuts vulan far part è Clalüna persvadì.
Mo l'entschatta da la prevenziun
Las infurmaziuns sin la carta interactiva online è l'emprim pass per prevegnir a conflicts tranter uman ed animal, di Gian Clalüna. Uschè saja la finamira a Segl che en 5 onns èn tut las sendas separadas cun saivs dals animals. Quai munta blera lavur e custs. Sch'ins fa dentant mintg'onn insatge, vegn ins a frida cun tut.