Acziun da salvament dal CAS, la Rega e las pendicularas Scuol

Ils alpinists dal Club alpin svizzer han trenà ensemen cun la Rega l'evacuaziun da la pendiculara.

Laschar ir video «Trenament per evacuaziuns ord pendicularas en l'Engiadina»

Trenament per evacuaziuns ord pendicularas en l'Engiadina

2:56 min, Telesguard dals 9.11.2017

La Rega, ils spezialists da la colonna da salvament e collavuraturs da las Pendicularas Scuol Motta Naluns han exercità l’evacuaziun da persunas ord las cabinas da la pendiculara.

Durant radund tschintg uras han differents pilots da la Rega ma era da la Helibernina fatg quest trenament en stretga collavuraziun cun spezialists. La communicaziun tranter il pilot, il spezialist vid la suga ma era il persunal che sa chatta sin il fund è fundamentala per che tut funcziuna senza incaps.

Suenter mintga exercizi vegnan analisadas las evacuaziuns en furma d’in discurs cuminaivel. Ils responsabels èn fitg cuntents culla lavur prestada.

Exercitar per il cas serius

I capita darar che las cabinas da la pendiculara stattan propi salda durant pliras uras, la tecnica moderna da las pendicularas d’ozendi è drizzada en per tals cas. Suenter trais uras e mesa ston ils passagiers esser evacuads, quai pretenda la lescha.

Chasper Planta, il responsabel per las pistas e per il salvament tar las pendicularas Motta Naluns è cuntent cun l'andament da l'exercizi. El ha era sez prendì part sco persuna en la cabina a l'exercizi. Evacuadas èn vegnidas mintgamai trais persunas per sgol. En ina da las cabinas eran per il pli sis persunas.

Sur mezdi hai dà ina pausa e suenter gentar ha l'exercizi cuntinuà cun ulteriurs sgols da salvament.

RR actualitad 11:00