Avant exact in onn aveva la Regiun Engiadina-Bassa/Val Müstair EBVM fatg a savair ch’ella haja incumbensà in biro da giurists independent per eruir, tgeninas pussaivladads che las vischnancas hajan per pudair far valair lur dretgs en connex cun il scandal da cartel.
Evitar la surannaziun
Per evitar che eventuals donns suranneschan haja la regiun pretendì quella giada immediat che las firmas involvidas en l'affera renunzian da far valair ina surannaziun – u en pled giuridic exact ina «Verjährungseinredeverzichtserklärung». Las vischnancas han cun questa renunzia temp fin il 2021 d'eruri quai ch'è stà durant ils onns pertutgads da las surdadas da lavur.
Far responsabel ils involvids
Tar la dumonda da co proseguir mussia l'examinaziun dal biro da giurists differentas vias. La conferenza dals presidents communals suttastritga dentant:
La Regiun Engiadina Bassa / Val Müstair sa distanziescha cler e net da mintga cunvegna illegala che tanghescha e donnegescha las submissiuns da construcziun en nossa regiun – quai valia per il passà, per il preschent e per l'avegnir.
Quai saja er la raschun ord la quala la regiun fetschia valair ses dretgs envers las interpresas pertutgadas. Ina tscherta flexibilitad para la conferenza dentant da signalisar als impressaris:
En quest connex vegn a resguardar la Regiun Engiadina Bassa / Val Müstair natiralmain er la prontezza da las interpresas pertutgadas, da restituir ils donns chaschunads e lur prontezza d’agir tar las submissiuns da construcziun en avegnir tenor las leschas applitgablas.
Victor Peer il president da la Regiun Engiadina Bassa/Val Müstair declera che la prontezza da las interpresas da suttascriver la renunzia sin ina surannaziun demussia ch'era quellas hajan il basegn da sclerir tut ensemen. Sch'ins vegnia da mussar tge donn finanzial ch'è vegnì chaschunà, lura pudess ins puspè turnar tar la normalitad e serrar giu il cas.
Dimensiuns actualmain anc betg survesaivlas
Actualmain dettia quai dentant anc differentas examinaziuns che na sajan betg finidas: Uschia sajan tant la Cumissiun da concurrenza WEKO sco er il tribunal administrativ federal anc vi da la lavur. Las consequenzas dal cartel da construcziun sajan pir survesaivlas, sch'er quellas decisiuns sajan sin maisa.
Ils proxims pass
Per las vischnancas cumenza uss la gronda lavur. Ellas ston ir a la tschertga en ils archivs per las grondas construcziuns dals ultims onns. Da guardar èsi tge projects che suttastevan a las submissiuns e da guardar tge contracts ch'ins ha fatg cun las interpresas da construcziun, ha declerà Victor Peer. Ina cunvegna ch'è probablamain da chattar en quests contracts è, ch'i dat in chasti convenziunal sch'i vegn cuntrafatg a las submissiuns.
RR novitads 18:00
