Siglir tar il cuntegn
Inhalt

Engiadina Affera da cartels: Renfatschas envers Engler

Sco il schurnal regiunal da SRF ha retschertgà vegn l'anteriur directur da construcziun, Stefan Engler, en il focus. Tenor il rapport publitgà quest'emna da la WEKO duai Engler esser stà involvì en cunvegnas da pretsch. Quel refusa las renfatschas, el na saja mai stà involvì en cunvegnas.

Stefan Engler.
Legenda: Stefan Engler, l'anteriur directur dal departament da construcziun e cusseglier dals chantuns, duai esser stà involvì en cunvegnas da pretsch. Keystone

I sa tractia tar las renfatschas d'in project en Engiadina Bassa dal 2007 per ina summa da radund 1,8 milliuns francs. Quella giada era Stefan Engler directur dal departament da construcziun en Grischun. En il cas menziunà, haja in interprendider prendì si contact cun Engler avant che las lavurs sajan vegnidas surdadas. Gist quest interprendider haja lura er survegnir las lavurs, malgrà ch'in concurrent aveva inoltrà in'offerta pli bunmartgada. En pli era vegnì impedì ch'il concurrent cun l'offerta pli favuraivla avess pudì far recurs.

Engler sez na vul betg s'exprimer pli detaglià davart il cas. El accentuescha però, ch'el na saja mai stà involvì en cunvegnas da pretsch. La chaussa vegnia actualmain examinada da la PUK. Auter che la WEKO examinescha quella er la rolla da l'administraziun e da la regenza en l'affera da cartels.