Jonas Kühni da Samedan ha fatg la scolaziun da magister ed ha il sindrom da gidar. Perquai fa el adina puspè remplazzaments da magisters e s'engascha uschiglio tar differents projects d’agid sin tut il mund.
Il mars è el turnà d’in project da la Nova Zelanda. Quai è stà precis quest mument cura ch’ils emprims cas da corona èn vegnids confermads en sia patria en Engiadin’Ota. Per Jonas Kühni èsi stà cler ch’er el vul gidar ed è perquai s'annunzià immediat sco voluntari tar l’ospital a Samedan. Là ha il giuven da 28 onns sustegnì durant sis emnas ils medis sin la partiziun intensiva.
Remplazzar visitas
Oravant tut ha il Samedrin gidà ils medis cun prender temp per ils pazients. Quels n’han numnadamain betg pudì beneventar visitas. Uschia èsi stà fitg impurtant ch’els han gì insatgi per discurrer. Tenor Jonas Kühni han els uschia er pudì emblidar per in mument nua ch’els èn.
Il contact cun ils pazients è stà fitg impurtant. Cun quai ch’els n’han betg pudì avair visitas, sun jau stà sco in pitschen remplazzament.
Gidass adina puspè
Impressiun han er fatg tut ils collavuraturs a Jonas Kühni. Er sche nagin dad els ha savì co la situaziun sa sviluppeschia, haja mintgin adina gidà nua ch’el pudevia e tuts hajan tegnì ensemen. La decisiun da gidar en l’ospital saja stada la gista. Per Jonas Kühni è cler ch’el gidass adina puspè.