Sumegliant a quai ch’ils purs fan gia uss, numnadamain deponer la grascha sin mantuns en batschigls da betun, duess la grascha fermentar en in sistem serrà, uschia ch’ins avess suenter direct il cumpost pront e damain spizza.
Ins di er che tut quai che spizza, fermentescha fauss. Ina fermentaziun che na spizza betg è la dretga per l’ambient.
Il sistem cun deponer directamain la grascha en in container serrà, funcziunass senza emissiuns dad amoniac ed er senza stuair duvrar energias externas.
Experientschas en Svezia
Il sistem che Peter Angelini vuless gugent introducir sin ses bain per cumpostar grascha è gia enconuschent. En Svezia sajan ins vid experimentar en regiuns sumegliantas a la Svizra nua ch’il temp ideal per la vegetaziun è er pli curt ed il process da fermentaziun da la grascha memia plaun.
Anc plirs segns da dumonda
Tenor il pur da S-chanf sajan anc blers puncts da sclerir. Tranter auter la finanziaziun d’in tal container, ma er il material da quel che pudess vegnir donnegià svelt tras l’amoniac e l’acid che vegn dà liber tras la fermentaziun.
«Agricultura neutrala al clima» ha selecziunà totalmain 50 bains purils en l'entir chantun Grischun ed accumpogna ils singuls projects ils proxims tschintg onns.