Ensemen cun Christoph Klemm ha Alois Jurt manà fin tar sia mort las partiziuns da pliras interpresas da la famiglia Niarchos en l’Engiadina. Quai oravant tut tar la Corvatsch SA, uss nov er cun la Diavolezza – Lagalb ed ils dus hotels da tschintg stailas «Kulm» a San Murezzan ed il «Kronenhof» a Puntraschigna. Las quatter interpresas represchentan l’enviern cun radund 630 emploiads in dals pli gronds donaturs da lavur en il chantun Grischun.
Funcziun da bab
Alois Jurt è creschì si en il chantun Sviz ed era gia s'annunzià il 1952 tar la famiglia dal possessur da navs grec Stavros Niarchos sco contabel. Dapi là è el restà fidaivel a la famiglia ed è daventà ina figura da bab suenter la mort da Stavros Niarchos, quai surtut per ils dus figls e la figlia ed ils ertavels da tut l’imperi.
Visiunari e bun partenari per discussiuns
Sco che l’anteriura presidenta communala da Silvaplauna, Claudia Troncana sa regorda, era Alois Jurt surtut in bun partenari per discussiuns per part fitg diras, ma adina «fair». Durant bnamain 50 onns ha el er gidà da realisar projects cun grondas investiziuns en la duas chasas da tradiziun a San Murezzan ed a Puntraschigna, scriva la «Grand Hotels Engadinerkulm Holding SA» en l’annunzia da mort. Tgi che vegn a succeder a Jurt ch'è mort ils 14 d’october 2017 en la vegliadetgna da 89 onns a Monte Carlo, n’è anc betg enconuschent.
RR actualitad 07:00