En emprima lingia haja la segirezza prioritad, ha suttastritgà il manader da la regiun ost tar Swissgrid, Christian Arpagaus. Perquai vegnan ils arbers tagliads dapart toc per toc e sgulads davent cun l’helicopter. Fin la fin da l’emna che vegn duess il material vegnir transportà giu da l’Alvra.
Provediment da forza è segirà – dentant evitar ulteriurs donns
Ils quatter arbers ch'èn cupitgads, n’hajan per il mument betg ina funcziun che influenzass il provediment da forza electrica, ha precisà Arpagaus.
Uschia vul ins uss segirar ils auters pilasters lung il pass ch'eran colliads cun quels donnegiads e decider pir suenter cura ed en tge furma ch’els vegnan remplazzads.
Pli stabil e ferm per far frunt a forzas pli fermas da la natira
Segir correspundian ils novs arbers a las novas prescripziuns ed hajan cun quai er dad esser pli ferms e pli resistents sco anc avant bun 60 onns. Tenor Christian Arpagaus gioga la natira e sias forzas adina pli fermas ina gronda rolla tar la planisaziun.
Quant aut ch’il donn è per la Swissgrid na saja anc betg enconuschent. I saja da far quint dentant segir cun in import enturn in milliun francs.
RR actualitad 17:10 / Telesguard 17:40
