Da tschella vart da l'En da Bever, sin la deponia Sass Grand ad Isellas, vegniva pli baud deponì l'entir rument da l'Engiadin'Ota. Cunzunt la fin dals onns 60 ed ils onns 70 hajan ins purtà tut en quest lieu e simplamain deponì:
Frestgeras, autos, laina, maschinas da lavar – tut quai vegniva deponì.
L'onn 1978 èsi alura vegnì sanà ed engrondì la deponia ad Isellas. Era mesiras per la protecziun da l'aua e stuppadiras per la veglia deponia èn vegnidas prendidas en quest connex. Dapi l'onn 2000 n'èsi insumma betg pli lubì da deponer ruments da chasa ad Isellas, cunquai che deponias avertas n'èn betg pli lubidas. Anc oz vegni mintg'onn controllà periodicamain sche l'aua da la deponia è netta u betg.
Ils da Bever tranter daners e spizzas?
Cunzunt l'enviern era la deponia in problem: Cura ch'i vegniva pli fraid, lura eran las spizzas pli fermas. E cunzunt per ils giasts che faschevan passlung era quai problematic, cunquai che quella è gist là en vischinanza. En il vitg sez n'eri betg uschè in grond problem. Perquai ch'il vent vegniva bler ord la Val Bever, vegniva il tuffien sburflà davent dal vitg.
E per ils da Bever era quai l'entschatta bain ina chaussa lucrativa. La vischnanca burgaisa survegniva in bun daner da las vischnancas vischinantas per il dismetter, uschia l'anteriur president da quella, Bernhard "Berni" Puorger.