Siglir tar il cuntegn

Header

cuntegn

Archiv cultural Engiadin'Ota Dora Lardelli è morta

Dora Lardelli è morta la dumengia passada, ils 29 da schaner 2023, suenter greva malsogna. Ella ha gì 69 onns. Quai ha confermà Gian Nicola Bass, il collavuratur da l'Archiv cultural d’Engiadin’Ota a RTR.

L’autura ed intermediatura d’art era naschida ils 28 da december 1953 a Soglio. Ella ha studegià e fatg il licenziat en istorgia d’art. Durant stgars 20 onns ha Dora Lardelli manà il Museum Segantini a San Murezzan.

Fundà Archiv cultural d’Engiadin’Ota

Il 1988 ha la Bergiagliotta fundà ensemen cun Giuliano Pedretti l’Archiv cultural d’Engiadin’Ota. Durant retschertgas per in’exposiziun avevan ils dus perscrutaders chattà en chasas engiadinaisas plunas da documents, fotografias, antiquitads, cudeschs, brevs e plans. Tut documents prezius ch’eran degns da vegnir archivads e preservads da donns. Dapi il 1991 è l’archiv cultural s’installà en la Chesa Planta a Samedan, nua che Dora Lardelli ha er manà quel. Quest atun duai l’archiv far midada en in nov dachasa a Zuoz. Actualmain vegn la Chesa Planta sanada per quel pass.

Dora Lardelli ha survegnì plirs premis per sia lavur. Tranter auter è ella vegnida onurada il 2012 per ses vast engaschament en la scena da cultura e perscrutaziun, cun il premi cultural dal Chantun Grischun.

La sepultura ha lieu venderdi, ils 3 da favrer 2023 a Vicosoprano.

audio
Per tadlar: curt e cumpact
ord RTR Audio dals 31.01.2023.
laschar ir. Durada: 1 minuta 4 Secundas.

Or da l'archiv:

RTR novitads 12:00

Artitgels legids il pli savens