L’Operetta Ardez turna questa stad per quatter represchentaziuns sut tschiel avert e cun ina parabla legendara sin il program. Cun sustegn d’in cor da var 20 scolaras e scolars d’Ardez e conturns, orchester e solists vegn l’opera «Hänsel e Grettina» represchentada. Il directur artistic – Chasper-Curò Mani – è stà fitg surprais da la gronda participaziun dals uffants, ch’èn stads pronts d'exercitar durant lur vacanzas da stad.
Da pudair preschentar Hänsel e Grettina ensemen cun ils uffants da la regiun è in grond enritgiment per l’operetta. Jau sun intgantà quant svelt ch’els han emprendì tut las chanzuns aifer curt temp.
La basa per «Hänsel e Grettina» furma l’opera d'Engelbert Humperdinck. L’interpretaziun plurilingua – cun texts da Bettina Vital – vegn mussada a Plan Plaz, davant ina culissa imposanta e sin in cleragl misterius amez la natira.
Ina parabla moderna
L’istorgia da Hänsel e Grettina è vegnida adattada al temp d’ozendi. Uschia na datti betg be pizieutas sco tentaziun per ils uffants, mabain er ina Coca Cola u vatta da zutger. Ed ils dus protagonists principals – chantà da Sara Bigna Janett e Gianna Lunardi – èn schumelins gia in pau pli vegls. Uschia ch’els vesan e chapeschan era cun tge sfidas che lur geniturs han da cumbatter per savair surviver en in mund cun adina dapli segundas abitaziuns en vischinanza.
In affar da famiglia
La societad Operetta Ardez prevesa mintga trais onns ina nov’ovra sut tschiel avert. Da la partida al timun da las preschentaziuns sajan adina las medemas persunas, ha declerà Bettina Vital ch’è oriunda d’Ardez. Ella e ses um, Chasper-Curò Mani, furman cun Gianna Lunardi e Daniel Benz la testa da la societad. Durant ils ultims onns sajan lur famiglias era creschidas e per part èn ils uffants dals solists era gia en ina furma u l’autra sin il palc.
