Il plazzal da construcziun dal project «Islas» da la vischnanca da San Murezzan sa chatta ordaifer il vitg vers Champfèr. Il parlament da la vischnanca ha en sia ultima sesida fatg l'emprima lectura da la missiva per la votaziun dals 30 da november. Tenor la missiva ha il project quatter parts.
Tge ch'ils custs da 114 milliuns francs cumpiglian
Il project cumenza cun la sanaziun d'ina veglia deponia sut il plazzal da construcziun. Quella vegn a custar 27 milliuns francs. Inclus qua è era l'avertura dal terren. Suenter vegn construida la nova halla da glatsch inclusivamain era ina chasa da parcar cun 150 plazzas per vehichels. Custs: 57,4 milliuns per la halla e 18,1 milliuns francs per il parcadi. La halla per rimnar material da reciclar custa 11 milliuns francs. La halla da glatsch vegn era planisada uschia, che dus heliports pudessan avair plazza en l'avegnir sin il tetg da l'edifizi.
Il project è il pli captivant dossier ch'jau hai pudì accumpagnar.
La concurrenza per la halla da glatsch Islas ha gudagnà il project «Balantscha»
Inoltrà projects avevan 23 teams da planisaziun – cun la plima è la fin ì il project dals architects ed inschigners da construcziun Penzel Valier SA a Turitg. Sco che la vischnanca da San Murezzan communitgescha, persvadia la proposta tant ord vista da la clientella sco era dals manaschis.
In project en favur dal sport
La halla da glatsch duai porscher plazza per var 400 persunas. Plinavant duai dar gardarobas e lieus per trenar la forza e per far gimnastica. Surtut las uniuns localas da hockey, dentant er classas da scola ed atletas u atlets da differents sports duain pudair utilisar l'infrastructura. Er ina utilisaziun publica duai esser pussaivla, e sche las reservaziuns permettan er in diever turistic. Sin l'areal duai plinavant dar ina plazza da parcar cun 150 plazzas.
La suprastanza ed il cussegl da vischnanca da San Murezzan avevan gia en il plan per la legislatura actuala decis da realisar ina halla da glatsch.
Renovaziun avant construcziun
Avant ch'i po vegnir construì sin l'areal, sto il terren enturn la deponia veglia vegnir sanà. Davart il credit per quai duai la populaziun votar ils 30 da november 2025. Sche tut va tenor plan, duess l'onn 2027 vegnir cumenzà a construir. La halla da glatsch duai ir en funcziun la fin dal 2030.
Ensemen cun la halla da glatsch collia la vischnanca er anc ulteriurs projects. L'arena da glatsch existenta Ludains duai vegnir stgarpada giu. L'areal a la riva dal lai duai sinaquai vegnir transfurmà. Plinavant duai er la halla da recicladi sper la staziun vegnir stgarpada giu. Sin il spazi liber planisescha la Viafier retica abitaziuns per indigens.
Or da l'archiv