Siglir tar il cuntegn

Header

audio
Exposiziun en il Museum a Segl cun pionieras zuppadas
Or da Actualitad dals 07.08.2020.
laschar ir. Durada: 04:35 minutas.
cuntegn

Art e cultura en Engiadina Valladas da las dunnas – cun pionieras zuppadas

L’exposiziun actuala en il Museum a Segl preschenta las protagonistas en furma d’ina curta biografia, illustrada en rumantsch, tudestg e talian. Ultra da quai èn er expostas ovras da las 24 dunnas. Tranter auter er lavurs a maun, fotografias, chartas e perfin in diari d’ina Segliotta.

Jau vess mai pensà che nus pudain perfin exponer il enconuschent schal verd da Marcella Maier.
Autur: Barbara Liebstercuratura Museum Segl

Sper pionieras enconuschentas sco Annemarie Schwarzenbach u Marcella Maier, u era las scripturas Romana Ganzoni e Jessica Zuan, vegnan er purtretadas per exempel las duas soras Anna e Teodora Maurizio da la Bergiaglia. Ellas che han fatg carriera e s’engaschadas adina puspè per lavur da dunnas. Tranter auter cun instruir e porscher lavur a Bergamo a la Scuola di Macramé (ina tecnica da nuar ornaments, textils e cliniez).

Giunfra Clementina

Regurdientschas e material cun blers fastizs èn er avant maun da la poetessa e mediatura per litteratura rumantscha, Clementina Gilly, oriundamain da Zuoz. Fin tar sia mort il 1942 saja tut sia vita stada il svilup e la promoziun dal rumantsch, uschia la curta biografia en l’exposiziun a Segl. Ina fotografia speziala mussa la dunna gia pli attempada ensemen cun l’ustiera da Segl, Annigna Godly. Fotografà las duas pionieras aveva Annemarie Schwarzenbach.

fotografia da dus dunnas
Legenda: Clementina Gilly ed Annigna Godly, fotografà dad Annemarie Schwarzenbach RTR, Anna Caprez

Las biografias persunalas da dunnas en las valladas dal sid e l’Engiadina dals ultims trais tschientaners fissan anc bler pli numerusas. Finalmain ha la curatura Barbara Liebster simplamain gì da far ina selecziun dal material ch’ella ha ramassà dapi il 2018.

L’exposiziun Valladas da las dunnas resta anc fin la primavaira dal 2021 en il Museum a Segl.

RTR actualitad 12:00

Artitgels legids il pli savens

Scrollar a sanestra Scrollar a dretga