En tut tschintg fanestras da l’artist indigen Gian Casty decoreschan la paraid dal suler sutterran tranter la chasa da parcar ed il center da Zuoz. Tenor il president communal, Flurin Wieser, n’è il fatg ch’ins cumbinescha art cun in edifizi da betun betg insatge paradox, anzi per el rendan ils maletgs sin vaider gist anc pli attractiva la colliaziun.
Tarpun rudlant
Sin ina lunghezza da 95 meters collia in tunnel sut ils ierts e mirs da chasas engiadinaisas vi la vischnanca cun la chasa da paracar che è situada a l’ur da Zuoz. Per in transport pli cumadaivel datti in tarpun rudlant. Quai dentant be en ina direcziun, vers il center.
Enavos vai a pè, ma cun quai ch’i va en giu, va quai bunamain gratuit.
Pront per l’avegnir
Il project che porscha 108 plazzas da parcar cuntegna er intginas per chargiar autos electrics. La chasa che ha custà 9 milliuns francs, pudess la vischnanca engrondir tut tenor basegn, ha agiuntà Flurin Wieser. Pussaivel fiss er ch’ins realisass per exempel in glatsch artifizial sin il tetg da la chasa da parcar. Entant è quella surfatscha sut terra e la vetta naira sa transmida bainbaud puspè en in prà verd.
Sonda ils 17 da zercladur 2017 èn las portas da la nova chasa da parcar a Zuoz avertas per tut la populaziun.
RR actualitad 08:00
