Ils sforzs vegnan però premiads cun ina natira da bellezza, in mir da serra imposant e diversas installaziuns d’art che s’integreschan elegant en la cuntrada enturn il mir e la chamona d’Albigna. Sia quai in auto che va giu per il mir da serra, trais laternas da via montadas amez in grip, in’istorgia scritta lung la spunda dal mir, nimfas da metal amez in lajet da muntogna ed anc bler auter.
Artists renumads da tut la Svizra
Curatur Luciano Fasciati, che ha organisà «Arte Albigna» sin proposta da la guardiachamona Annamaria Crameri, ha dumandà 14 artists or da tut la Svizra, sch'els vulan sa participar a quest project. Nagin ha subit ditg gea, ma suenter avair visità la regiun e sa fatschentà cun il spazi, è in suenter l’auter stà fascinà da l’idea. Tranter auter era nums enconuschents sco Pippilotti Rist e Roman Signer.
Als artists èsi gartegià fitg bain, da na concurrenzar lur art cun la natira ed il mir imposant.
Cun ovras concepidas aposta per quest project sa refereschan ils artists a las particularitads istoricas, socialas, politicas e geograficas da la regiun da l’Albigna. Ovras che duessan carmalar tant ils interessads d’art, ma era alpinists, viandants, turists ed indigens da vegnir a far ina spassegiada admirond art.
Arte Albigna
«Arte Albigna» cuzza dals 2 da fanadur fin ils 30 settember.