Siglir tar il cuntegn

Header

Navigaziun

Portrait.
Legenda: L'anteriur president communal da San Murezzan è il nov CEO da l'Academia Engiadina SA. RTR, Anna Caprez
cuntegn

Engiadina Asprion nov CEO da l'Academia Engiadina

Sigi Asprion, l'anteriur president communal da San Murezzan, surpiglia il cumenzament da favrer la nova funcziun. Quai scriva l'Academia Engiadina en ina communicaziun a las medias.

Il cussegl d'administraziun da l'Academia Engiadina SA ha elegì Sigi Asprion sco nov CEO e manader «Hospitality».

Sigi Asprion, l'anteriur president communal da San Murezzan, saja dapi passa 30 onns en funcziuns da manar – perquai portia el sper sia savida excellenta er ina rait da contacts preziusa cun sai. Quai scriva il cussegl d'administraziun en sia communicaziun.

Il cussegl sa mussa persvadì che Sigi Asprion possia manar vinavant cun success il svilup da l'Academia Engiadina. Asprion daventa il favrer successur da Thomas Malgiaritta ch'aveva surpiglià la direcziun l'october passà ad interim.

L'Academia Engiadina ha dà da discurrer ils ultims mais adina puspè pervi da turbulenzas persunalas: Entaifer curt temp eran tant il CEO, Matthias Steiger, sco er la presidenta dal cussegl d'administraziun da l'Academia Engiadina, Annemarie Perl sa retratgs.

RR novitads 15:00