Siglir tar il cuntegn

Header

cuntegn

Engiadina Aua gronda a Scuol: Nov urizi lascha crescher la Clozza

Suenter las malauras da mesemna saira ha in ulteriur temporal chaschunà gronds donns ed auaziuns. Gievgia saira curt suenter las 18:00 è l'aual che passa tras Scuol, la Clozza, sa transfurmà quasi en in flum selvadi.

En plirs lieus è la Clozza ida sur la riva ora ed ha chaschunà donns considerabels. Plinavant ha la Clozza tratg cun sai bler material, belma, crappa, bostga e perfin in auto. Persunas n’èn betg sa blessadas.

9 bovas van a val – 7 en val S-charl

Ils ferms temporals da mesemna avevan gia chaschunà gronds donns sin il territori dal la vischnanca da Scuol. Il pli ferm pertutgada è la Val S-charl. Là èn vegnidas giuadora 7 bovas.

La via resta serrada segir enfin sonda, conferma Jon Carl Stecher, il manader tecnic da la vischnanca da Scuol ad RTR. La fracziun da S-charl è quatras serrada giu dal traffic, senza forza electrica ed era senza telefon. Er a pè na saja quai betg pussaivel da vegnir en la Val S-charl, perquai che sin in traject da radund 100 meters saja la via inundada.

Jon Carl Stecher quinta che circa 100'000 meters-cubics material sajan vegnids a val.

Gronds donns era tras 2 bovas en la fracziun Pradella

A Pradella eran gievgia saira duas bovas idas a val en la Val Lischana e la Val Triazza.

Sco quai che la polizia chantunala grischuna scriva, haja in champ da vacanzas stuì vegnir evacuà. En tut sajan 140 persunas (100 uffants e 40 manaders) vegnidas manadas en il center da la protecziun civila a Scuol.

Ils pumpiers han surveglià la situaziun la notg. Persunas blessadas na datti naginas. Ils donns da material èn dentant gronds. Plirs autos e pliras chasas èn vegnidas donnegiadas. La summa dals donns n’è anc betg enconuschenta.

«L'emprim è vegnì a val bler material e bun ina mes'ura pli tard lura la gronda bova», di Carla Wetzel, ina perditga vers Radio Rumantsch.

Carla Wetzel, ina vischina da Pradella.
Legenda: RTR
Nus n’avain betg realisà ch’i pudess vegnir giuador insatge uschia.
Autur: Carla Wetzel vischina da Scuol-Pradella

Meteorologs conferman 40-50 mm plievgia entaifer curt temp

Ier saira hai dà plirs urizis – per part er ferms – en il Grischun. Cunzunt l'Engiadina Bassa enturn la regiun da Scuol è stada pertutgada. Il resultat: Pliras bovas. En la regiun sur Pradella è ina cella da plievgia stada eri precis sur il flum ed ha uschè chaschunà la bova.

Il meteorolog dad SRF, Christoph Sigrist declera quai cun blera umiditad che va cun il vent ensi, uschia che daguts sa furman. Quels daguts daventan lura pli e pli gronds ed uschia dat quai daratga. Precis quai è capità a Scuol – uschia che 40 fin 50 mm plievgia èn vegnids entaifer curt temp a terra e quai precis sur il flum. Entras quai è quel s’emplenì e la bova è sa furmada.

Artitgels legids il pli savens