Siglir tar il cuntegn

Engiadina Avant in onn aveva cumenzà l'odissea da l'Institut Otalpin Ftan

Oz avant in onn è arrivada la nova che l'Institut Otalpin Ftan stoppia serrar las portas pervia dad in deficit memia grond. In onn pli tard prov'ins anc adina da rabagliar nà cifras nairas en ils rendaquints.

Institut Otalpin Ftan
Legenda: Avant 1 onn è arrivada la nova che l'Institut Otalpin Ftan stoppia serrar las portas RTR

Oz, ils 21 da fanadur èsi precis in onn ch'ina novitad ha schoccà ina regiun entira: Ord motivs finanzials e mancanza da scolars ha l’Institut Otalpin a Ftan, o «Insti» co ch’el vegn numnà en la regiun, stuì annunziar da serrar sias portas. In grond culp per geniturs, scolars e magisters.

Ma be in emna pli tard la novitad allegraivla: l'avegnir da la scola da tradiziun saja garantì. Quai suenter in’acziun da salvament da geniturs ed indigens che ha fatg squitsch sin la politica da reagir.

Mo 75 scolars il nov onn da scola

In temp turbulent che resta en memoria. Era al nov president dal cussegl d'administraziun, Jon Peer che è uss dapi bundant in mez onn al timun da la scola. L’um cun ragischs engiadinaisas fa ina prima bilantscha anc pauc euforica. Il numer da scolars resta bass era per il proxim onn da scola ed è in dals pli gronds quitads da la scola. Numnadamain entschaivan mo 75 scolars il nov onn da scola, memia paucs en congual cun ils buns onns en il passà.

RR actualitad 17:00