La fin dal 2021 aveva la suprastanza communala da Scuol inizià ina gruppa da project per ramassar propostas per in svilup coordinà dals implants da sport, turissem e temp liber en la regiun. Las finamiras strategicas èn entant vegnidas definidas. Il mars è il project vegnì preschentà a radund 40 persunas or da las differentas societads ed organisaziuns localas. Ils 16 da zercladur vegn infurmada la populaziun en chaussa.
Durant la stad vul la gruppa da project enturn il cussegl administrativ da l'Engiadina Scuol Turissem SA discutar las variantas ensemen cun la populaziun. La finamira è da sviluppar vinavant la purschida sin ils areals da Trü, dal Bogn Engiadina Scuol, quel da Quadras e la halla da glatsch Gurlaina e conturns.
Scuol vul proxim grond impuls
Bunamain 30 onns suenter l’avertura dal Bogn Engiadina saja la vischnanca fusiunada pronta per novs projects, scriva «Avegnir Infra Scuol». Quint vegnia fatg cun custs da radund 45 milliuns francs per tut ils areals ensemen. Anc la fin da quest onn duai il credit da planisaziun per la proxima fasa dal project vegnir deliberà.