Ils 7 avust 2025 ha la Fundaziun da provediment da sanadad d’Engiadin’Ota (SGO) envidà ad in segund discurs cun exponents da politica e persunas ch’èn s’exprimidas en furma negativa als plans d’in’integraziun dal spital regiunal da Samedan en quel chantunal a Cuira.
Sco gia tar l’emprim inscunter è sa cristallisà cleramain la necessitad d’ina finanziaziun intermediara. Quella dovri per che l'ospital possia cuntinuar cun sia gestiun l’onn proxim. La cunvegna da prestaziun cun las 11 vischnancas scada numnadamain ils 31 da december.
Direcziun futura resta dispitaivla
Betg perina sajan stadas las persunas preschentas a l’inscunter da dialog cun la SGO davart la direcziun ch’il spital d’Engiadin’Ota duess ir en avegnir. Ils quitads e protests encunter la missiva da votaziun dal matg veglia il cussegl da fundaziun da la SGO prender serius e tschertgar vinavant il dialog cun las differentas gruppaziuns per chattar ina soluziun.
Il cussegl da fundaziun vegnia ad elavurar las proximas emnas ina cunvegna da prestaziun per finanziar l’ospital l’onn proxim. Previs è che tut las 11 vischnancas vegnan a decider davart quella ils 4 da november.
Refusà integraziun la primavaira
La primavaira han las vischnancas da l’Engiadin’Ota refusà l’integraziun da l’Ospital Engiadin’Ota en l’Ospital chantunal da Cuira. Il tenor da l’analisa fatga en il rom da l'emprima maisa da discussiun organisada dal cussegl da fundaziun da la SGO ha mussà, ch’il project da votaziun n’ha betg pudì respunder avunda a las dumondas avertas ed als dubis. Il medem mument è la maioritad dals preschents persvadida, ch’i dovria en mintga cas l’Ospital chantunal per vegnir a frida cun las sfidas existentas.
Grondas sfidas finanzialas stattan davant porta
La cunvegna da prestaziun da las vischnancas cun la SGO, che furma la basa per il manaschi da l’ospital Samedan – scada ils 31 da december 2025. Per avair a disposiziun las finanzas necessarias per manar vinavant l’ospital, dovri ina nova cunvegna da prestaziun. E quella ston las votantas ed ils votants da tut las vischnancas approvar. Sco basa per la nova cunvegna duai servir la spierta actuala che na vegn betg adattada, hai num en la communicaziun da la SGO. Previs è, che las vischnancas tranter Segl e S-chanf decidan enfin la fin da november en chaussa.
Gia uss è cler che la nova cunvegna da prestaziun vegn a custar in bel rap, quai ha ditg envers RTR la commembra dal cussegl da fundaziun da la SGO, Selina Nicolay. Numnadamain bundant 27 milliuns francs. Da quels èn tranter 12 e 14 milliuns francs custs per la garanzia da deficit per la gestiun da l'ospital regiunal per l'onn 2026. En pli duain las 11 vischnancas far ina contribuziun d'investiziun da total 5 milliuns francs. Vitiers è la SGO e cun ella las vischnancas obligada da pajar enavos in emprest dal chantun Grischun sur da 7,8 milliuns francs.