Ils 7 d'avust 2025 aveva la Fundaziun da provediment da sanadad d’Engiadin’Ota (SGO) envidà ad in segund discurs cun exponents da politica e persunas ch’èn s’exprimidas en furma negativa als plans d’ina integraziun da l'ospital regiunal da Samedan en quel chantunal a Cuira.
Sco gia tar l’emprim inscunter era sa cristallisà cleramain la necessitad d’ina finanziaziun intermediara. Quella dovri per che l'ospital possia cuntinuar cun sia gestiun l’onn proxim. La cunvegna da prestaziun cun las 11 vischnancas scada numnadamain ils 31 da december.
Direcziun futura resta dispitaivla
Betg perina sajan stadas las persunas preschentas a l’inscunter da dialog cun la SGO davart la direcziun che l'ospital d’Engiadin’Ota duess ir en l'avegnir. Ils quitads e protests encunter la missiva da votaziun dal matg vuleva il cussegl da fundaziun da la SGO prender serius e tschertgar vinavant il dialog cun las differentas gruppaziuns per chattar ina soluziun.
Il cussegl da fundaziun ha elavurà las ultimas emnas ina cunvegna da prestaziun per finanziar l’ospital l’onn proxim. Quai sco schliaziun immediata per gudagnar il temp per chattar soluziuns persistentas per l'avegnir da l'ospital. Previs è che tut las 11 vischnancas, tranter Segl e S-chanf, decidan ils 4 da november – e tuttas ston esser d'accord. Per part ha la populaziun anc da confermar questa decisiun a l'urna ils 14 da december.
La repartiziun dals custs en la nova cunvegna
| vischnanca | clav | 2026 | 2027 | Total | |
|---|---|---|---|---|---|
| Segl | 3.41% | 947'980 | 784'300 | 1'732'280 | |
| Silvaplauna | 6.87% | 1'909'860 | 1'580'100 | 3'489'960 | |
| San Murezzan | 39.34% | 10'936'520 | 9'048'200 | 19'984'720 | |
| Schlarigna | 10.80% | 3'030'200 | 2'507'000 | 5'537'200 | |
| Puntraschigna | 10.80% | 3'002'400 | 2'484'000 | 5'486'400 | |
| Samedan | 12.51% | 3'477'780 | 2'877'300 | 6'355'080 | |
| Bever | 2.69% | 747'820 | 618'700 | 1'366'520 | |
| La Punt Chamues-ch | 3.96% | 1'100'880 | 910'800 | 2'011'680 | |
| Madulain | 0.88% | 244'640 | 202'400 | 447'040 | |
| Zuoz | 5.74% | 1'595'720 | 1'320'200 | 2'915'920 | |
| S-chanf | 2.90% | 806'200 | 667'000 | 1'473'200 | |
| TOTAL | 100% | 27,8 milliuns | 23 milliuns | 50,8 milliuns |
Ils 22 da settember ha la Fundaziun Provediment da sanadad Engiadin’Ota (SGO) preschentà la missiva per la cunvegna da prestaziun per l'auter onn. Questa prevesa custs da 50,8 milliuns francs che vegnan repartids sin las 11 vischnancas aifer ils proxims 2 onns. Tenor la nova presidenta dal cussegl da fundaziun da la SGO, Selina Nicolay, è questa cunvegna necessaria per l'ospital. Senza ina tala na saja betg garantì che quel survivia, cura che la cunvegna veglia scada la fin da quest onn.
Ditg sincer, quai fa schon mal. Jau ves tar las finanzas da mes vitg Bever nua che nus vegnin a stuair a desister sin projects en vischnanca u era pigliar si credits per pajar per la nova cunvegna.
Refusà integraziun la primavaira
La primavaira han las vischnancas da l’Engiadin’Ota refusà l’integraziun da l’ospital Engiadin’Ota en l’Ospital chantunal da Cuira. Il tenor da l’analisa fatga en il rom da l'emprima maisa da discussiun organisada dal cussegl da fundaziun da la SGO ha mussà, ch’il project da votaziun n’ha betg pudì respunder avunda a las dumondas avertas ed als dubis. Il medem mument è la maioritad dals preschents persvadida, ch’i dovria en mintga cas l’Ospital chantunal per vegnir a frida cun las sfidas existentas.
Igl è dus avant las dudesch. Jau sun persvasa che nus na faschain betg politica da tema, quai èn simplamain ils facts.
Grondas sfidas finanzialas stattan davant porta
Gia avant era cler che la nova cunvegna da prestaziun vegn a custar in bel rap. Numnadamain quintavan ins cun bundant 27 milliuns francs. Da quels èn tranter 12 e 14 milliuns francs custs per la garanzia da deficit per la gestiun da l'ospital regiunal per l'onn 2026. En pli duain las 11 vischnancas far ina contribuziun d'investiziun da total 5 milliuns francs. Vitiers è la SGO - e cun ella las vischnancas - obligadas da pajar enavos in emprest dal chantun Grischun sur da 7,8 milliuns francs.