Cun agid dal «ProTrek», in’invenziun da l’Universitad San Gagl, ed il sustegn da 24 gidanters, èn Dina Schmid, Erwin Graf e Sabrina Amstutz rivads en in lieu nua ch’els na fissan mai stads senza agid. Numnadamain sin la Chamona Kesch sin 2’625 meters sur mar.
Cun forzas unidas
Segirads cun tschintas e pachetads en chaud, èn els trais vegnids transportads si per la senda stippa e stretga adina alternant da 4-6 gidanters. Quai cun trair, stumplar e segirar il sez mobil che sumeglia in pau ad ina charetta. Grazia a la fiduzia ch’ils passagers han gì en lur squadra da transport, n’ha era betg patì il plaschair da l’aventura.
Jau hai mirveglias co che tut è en realitad, enfin uss hai jau be vis tut en la televisiun.
En tut han ils gidanters transportà quatter «ProTreks» durant bun tschintg uras e surmuntond 800 meters differenza d’autezza. En in da quels sezs mobils eran er sutgas a rodas, per garantir la mobilitad er en la chamona. La bellezza dal panorama durant il viadi si per la muntogna n’è betg adina stada visibla. Quai causa l’aura che ha adina puspè midà da singuls radis da sulegl, sur plievgia fin tar naiv.
Las temperaturas e la plievgia e naiv èn stentus, dentant giaud jau tuttina il viadi ventiraivel.
Satisfacziun e plaschair n’haja betg be dà tar ils trais passagers, dentant er tar ils gidanters ed organisaturs ch’han pussibilità la premiera d’ina excursiun da dus dis cun pernottaziun en ina chamona dal CAS.
