L'architect Chasper Cadonau da Valsot di, ch'i haja dà indizis clers per cunvegnas da pretschs tar ils impressaris. Ins haja vesì ch'els hajan gì radunanzas. El n'haja dentant mai badà ch'ils pretschs fissan stads bler memia auts en Engiadina Bassa. Ussa saja natiralmain la dumonda sch'ins haja propi pajà memia bler u betg. El sco architect saja dentant stut da la dimensiun da las cunvegnas suenter l'examinaziun da la WEKO.
Durant ils ultims onns haja el adina empruvà dad avair uschè bleras offertas sco pussaivel per mintga project, per pudair evitar da daventar victima dad ina cunvegna da pretsch.
Part da las cunvegnas?
Tenor Chasper Cadonau èsi bain pussaivel ch'i dat era architects involvids en cunvegnas da pretschs. El è persvadì ch'i na dettia betg architects involvids en Engiadina Bassa, quai en quel senn ch'i vegniss lavurà sistematicamain cun provisiuns. Dentant haja el vesì en auters lieus, nua che el haja lavurà che architects hajan fatg cunvegnas cun impressaris. En Engiadina Bassa datti tenor Cadonau plitost cas nua che architects prendian encunter ina spezia da regal u ina autra cunterprestaziun. Il giurist e spezialist per il dretg da construcziun Stefan Metzger aveva ditg mesemna envers RTR ch'el saja persvas ch'i dettia architects che sajan involvids en las cunvegnas da pretschs.
Uniun SIA na crai betg ch'i dat commembers involvids
L'Uniun grischuna d'inschigners ed architects SIA di che lur commembers stoppian sa tegnair vid reglas cleras che na permettian betg cunvegnas da pretschs. Il president da la SIA grischuna Maurus Frei ha ditg ad RTR ch'el na craja betg che commembers da sia uniun sajan involvids.
uIl titel d'architect na saja dentant betg protegì - i dettia era autras persunas che sa numnian architect. Sche insatgi fetschia quella lavur be pervia dals raps, sappia el schon s'imaginar ch'ins prova da far era gudogns da maniera illegala, uschia Frei vinavant.
RR actualitad 12:00
