Siglir tar il cuntegn
cuntegn

Engiadina Bainbaud nagin tren en Engiadina Bassa

Damai che la Viafier retica sto renovar tunnels, staziuns e punts – na vegnan nagins trens a cursar durant la stad 2019 sin il traject tranter Sagliains e Scuol.

Legenda: Guardar il video Bus enstagl tren tranter Sagliains e Scuol durant 6 mais dal 2019. Durada 03:21 minutas.
Or da Telesguard dals 09.10.2018.

Sche serrar – lura gist dal tuttafatg. La Viafier retica concentrescha tut las lavurs da construcziun sin il traject tranter Sagliains e Scuol sin ina perioda. Las lavurs duain vegnir realisadas entaifer la stad 2019.

90 milliuns investiziuns

La staziun da Sagliains vegn adattada a la lescha per impedids, ed il traffic tranter autos e camiuns vegn optimà. Era la staziun da Lavin survegn in sutpassadi e vegn uschia adattada per giasts cun impediment.
Plinavant dovran ils dus tunnels «Giarsun» e «Magnacun» ina sanaziun. En questa regiun è tut il terren en moviment. E lura sto era il viaduct sur la Val Tuoi vegnir sanà, in viaduct istoric da l'onn 1912.

L’auto da posta surpiglia il transport

A partir da mez mars enfin ils 7 da settember 2019 resta il traject tranter Sagliains e Scuol serrà. Giasts, pendularis ed indigens ston durant quest temp far la midada da l'auto da posta sin il tren e viceversa.

Mo la finala ha la serrada cumpletta per tuts in avantatg. La Viafier retica prevesa da spargnar 5 fin 10% dals custs, e lura è era la segirtad sin ils plazzals da construcziun bainquant meglra. Ed era il turissem vesa ils avantatgs. Meglier da far las lavurs en in curt temp intensiv, empè da disturbar sur divers onns la clientella che viagia cun il tren en Engiadina Bassa.

RR actualitad 17:00