Il Bernina Gran Turismo è la cursa da muntogna la pli populara per autos istorics. La cursa da muntogna furma la fin da l’emna da l’automobil en Engiadina Ota che ha lieu dals 2 fin ils 11 da settember. La cursa sezza ha lieu ils 10 ed ils 11 da settember.
Cun autos istorics e classics da viadi sin il Pass dal Bernina.
La cursa da muntogna Bernina Gran Turismo era fitg populara anc avant la segunda guerra mundiala. Duas giadas ha quai dà questa cursa da muntogna. L’onn 1930 è quai dentant stà fini cun sa mesirar cun ils pli sperts autos da quella giada sin in traject da la via dad in pass. Uschia è il Bernina Gran Turismo sparì da la carta cun occurrenzas dad autos. Pir l’onn 2014 han in per amis – cun la passiun per autos vegls, per istorics, e per models ch’èn daventads classichers – dà nova vita al Bernina Gran Turismo. Dapi lura datti puspè questa occurrenza.
Autos dal 1905 fin tar il 1990
Il dumber da participants che fan part a questa cursa istorica è limitada. Mo 80 autos pon ir a la partenza da la cursa ch’è gia puspè uschè populara sco tar las emprimas ediziuns al principi da l’ultim millenni. Ils autos partan sa chapescha en differentas categorias. Decisiv per questa classificaziun èn ils onns da construcziun dals vehichels. Uschia fan ins ina categoria per exempel cun autos sco il Aston Martin LM2 da l’onn 1928, en ina autra classa parta dentant per exempel il Shelby Cobra u il Porsche RSR dal 1974.
Impressiuns da l'exposiziun il di avant la cursa
-
Bild 1 von 8. Bildquelle: RTR.
-
Bild 2 von 8. Bildquelle: RTR.
-
Bild 3 von 8. Bildquelle: RTR.
-
Bild 4 von 8. Bildquelle: RTR.
-
Bild 5 von 8. Bildquelle: RTR.
-
Bild 6 von 8. Bildquelle: RTR.
-
Bild 7 von 8. Bildquelle: RTR.
-
Bild 8 von 8. Bildquelle: RTR.
Pass dal Bernina serrà pervia dal Gran Turismo
La cursa en il format sco quai ch'ella sa preschenta ozendi ha lieu sin il traject original dal Pass dal Bernina. Perquai è il pass serrà sonda e dumengia per pliras uras per tut l'ulteriur traffic. Ils autos da cursa han da far in traject da 5,7 kilometers da La Rösa fin sin l'Ospiz dal Bernina. Sin il traject dat quai circa 50 stortas ed ils pli sperts autos fan quel traject en in zichel dapli che trais minutas.