La societad Girella consista da differentas spartas: la chasa d'abitar a Bever, l'accumpagnament da viver extern «Speranza» a Puntraschigna e la Brocki a Schlarigna. Ella sustegna persunas cun problems psichics e socials tar lur reintegraziun en la vita da mintgadi e da lavur.
Emprims scleriments eran vegnids fatgs dal 2011, dal 2012 era vegnida fundada la societad ed il prim zercladur 2013 era la chasa d'abitar vegnida inaugurada. Ils emprims tschintg onns era quella en la Chesa Petronella a Bever, dapi il 2018 en l'anteriura pensiun Trais Piz amez la vischnanca. Dal 2016 aveva la Girella surprendì la Brocki a Schlarigna da l'armada dal salit. Trais onns ha ella era manà ina brocki a Zernez, quella ha dentant puspè stuì vegnir serrada, pervia da mancanza da rentabilitad.
Sparta importanta
Suenter 10 onns saja la Girella daventada ina part impurtanta da la rait sociala da l'Engiadin'Ota. La dumonda saja en mintga cas avant maun, di la manadra Ursi Costa. Da las nov plazzas en la chasa d'abitadi sajan en media otg occupadas. Per maximalmain quatter onns pon las abitantas ed ils abitants viver en la chasa d'abitadi.
Dumandà davart il highlight dals ultims diesch onns, di Ursi Costa ch'i sajan adina ils destins persunals che giajan a cor. Il plaschair sch'ina persuna po bandunar la chasa d'abitar e star puspè sin agens pes.
Bleras sfidas
Era las sfidas dependian savens da las abitantas ed ils abitants, uschia Ursi Costa. Dentant era da las finanzas. Surtut ils emprims onns eran las finanzas ina gronda sfida. Oz possa la societad engaschar tschintg persunas dal fatg cun in pensum total da 260%. En avegnir s'allegrass la dunna da 63 onns sch'i dess la pussaivladad da crear plazzar per persunas che survegnan ina renta d'invaliditad.
Cler è gia oz, ch'il manader actual da la brocki vegn a surprender en in onn, cura che Ursi Costa va en pensiun, la direcziun da l'entira Girella. Tgi che vegn a manar en avegnir la chasa d'abitar saja anc avert. Là sajan'ins uss en tschertga, uschè Ursi Costa. Premissa è che la chasa d'abitadi survegn l'onn proxim il nov permiss per ils proxims quatter onns e ch'il contract da locaziun po vegnir prolungà per ulteriurs tschintg onns.