Las cifras da la vendita da biera producida a Martina mussan che la strategia da la Bieraria Engiadinaisa è stada la gista. Fin la fin da settember ha l’interpresa vendì bundant 25% dapli biera che l’onn passà. Il factur che haja gidà a quel resultat saja oravant tut la collavuraziun cun la bieraria Doppelleu Boxer da Winterthur.
Corona, in product regiunal ed il label «bio» han influenzà il pli ferm la fitg buna vendita ils ultims mais.
Dapi il schaner 2020 venda la Bieraria Engiadinaisa ensemen cun la Doppelleu Boxer la biera che vegn fatga anc adina a Martina. La distribuziun da la biera en tut la Svizra saja uss daventada pli simpla ed er pli bunmartgada, admetta Andrea Gilli.
Collavuraziun strategica
Per rinforzar la collavuraziun tranter las duas bierarias, ha la radunanza extraordinaria elegì a Philip Bucher en il cussegl administrativ da la Bieraria Engiadinaisa. Bucher è il fundatur e manader da gestiun da la Doppelleu Boxer SA.
Per Andrea Gilli è numnadamain cler che la producziun dad oz fin 2'000 hectoliters biera l’onn, possia anc vegnir augmentada ils proxims onns. Ideas e projects dettia gia, dapli na vul il president dal cussegl administrativ dentant betg tradir. Be tant: la Bieraria Engiadinaisa duai restar sin il territori da la vischnanca da Valsot.