Siglir tar il cuntegn

Header

cuntegn

Bieraria Tschlin Biera, canedels e chant sco dividenda

Il facit da la 15avla radunanza generala da la Bieraria Tschlin SA è: Las finanzas e la logistica èn las grondas sfidas

Radund 135 acziunaris èn stads preschents en la sala polivalenta a Tschlin. Andrea Gilli, il president dal cussegl d'administraziun en carica ha preschentà il quint annual dal 2018. Quel serra cun in deficit da radund 50’000 francs. Actualmain è il cussegl d'administraziun ensemen cun il mainagestiun, Reto Rauch, vidlonder da elavurar ina nova strategia per la bieraria.

Oz producescha quella radund 1'500 hectoliters biera. Per pudair pudair daventar rentabel, stuess la bieraria producir en avegnir al minimum 4’000 hectoliters. Quai ha per consequenza che er la distribuziun sto vegnir intensivada. Ed era il deposit da biera sto vegnir engrondì. Andrea Gilli fa quint da cuntanscher quella finamira en 2 fin 3 onns.

In giarsun – in tecnolog da vivondas

Severin Dietrich – fin l’onn passà anc biatlonist – ha cumenzà l'emprendissadi sco tecnolog da vivondas tar la bieraria. En tut la Svizra datti sulettamain 9 plazzas d'emprendissadi sco tecnolog da vivondas. Cun las plazzas da lavur e la plazza d'emprendissadi che la bieraria porscha, vul ella er en avegnir producir ina buna biera.

Biera e canedels

Malgrà las cifras cotschnas, èn ils acziunaris cuntents cun la situaziun actuala da la bieraria. Sco dividenda hai er tar questa radunanza generala dà biera e canedels e quai als basta per il mument.

A la radunanza generala èn sper il president dal cussegl d'administraziun er ils suandants commembers dal cussegl vegnids reelegids: Manuela Ruinatscha, Fadri Riatsch, Jon Pitschen Janett e Duri Janett.

RR actualitad 08:00