Sco quai ch'il Lyceum scriva en ses rapport annual è il dumber da las scolaras e dals scolars s’augmentà per 11% sin 331. La svieuta è s’augmentada per 20% sin passa 26 milliuns francs. Sut il stritg ha il Lyceum Alpinum Zuoz fatg in gudogn da 1,9 milliuns francs.
Pront per il futur
La scola saja pronta per la modernisaziun e la renovaziun planisada, scriva il Lyceum Alpinum Zuoz plinavant. Concret ha la scola planisà da modernisar las stanzas da scola e l'equipament d'informatica per scolastas e scolasts sco era da renovar in dals bajetgs.
In lieu dal bainstar e dal barat
L'onn da scola passà ha il Lyceum Alpinum Zuoz investì en il campus e sviluppà vinavant quel. Ultra da quai ha la scola era schlargià ed avert las purschidas per scolars externs. Quai per promover l'interacziun tranter ils scolars era ordaifer las stanzas da scola. Il Lyceum porscha da nov purschidas da sport, art e cultura per promover il barat tranter ils scolars interns ed externs. Quai saja ina mesira per procurar per lur bainstar, uschia la scola.
En il Lyceum Alpinum Zuoz van a scola scolaras e scolars da passa 45 pajais. Tant il dumber dals scolars da l'exteriur sco era quel dals scolars da l'Engiadina crescha.
