Biosfera Val Müstair: Oscar Walther va ord atgna voluntad

Il manader da la Biosfera Val Müstair Parc Naziunal, Oscar Walther, banduna ses post. Sco quai che Walther ha ditg envers Radiotelevisiun Svizra Rumantscha RTR bandunia el la Biosfera gia suenter 4 mais puspè pervia ch’el haja survegnì l'offerta per in’autra plazza da lavur fitg attractiva.

purtret dad Oscar Walther Bild in Lightbox öffnen.

Legenda da maletgs: Oscar Walther ha chattà ina nova sfida professiunala. mad

Oscar Walther terminescha sia lavur tar la Biosfera ils 1 d'avust 2015, uschia scriva la Biosfera Val Müstair. Tant la cumissiun strategica da la Biosfera sco era il Cussegl communal da la Val Müstair deploreschian quest pass.

Plirs manaders a curt temp

Oscar Walther è stà en uffizi durant 4 mais per la Biosfera. El aveva cumenzà sia lavur il december da l’onn passà. Avant Walther è stà Andreas Ziemann il manader da la Biosfera. Era Ziemann n’è betg stà per lung temp en uffizi. El aveva bandunà il post suenter 8 mais.

Tge offerta che Oscar Walther ha survegnì na el anc betg pudì tradir. El ha dentant confermà al president communal, Arno Lamprecht, ch'el na bandunia betg la Biosfera pervia da problems u dispitas internas.