La radunanza communala da Val Müstair ha ditg na cun 65 encunter 55 vuschs a la proposta da la suprastanza communala da midar il num da «Biosfera Val Müstair» en «Parc da natira Val Müstair». La suprastanza communala aveva argumentà ch'il term Biosfera na saja betg la gista etichetta per il parc da natira. Quai perquai ch'i dettia adina confusiun tranter il «Reservat da Biosfera Engiadina Val Müstair» ed il «Biosfera Val Müstair». Il Parc da natira è ina part dal reservat da biosfera che porta il label da l'Unesco.
Emoziuns per il num actual
La gronda part dals 128 votants preschents ha dentant valità pli aut la valur ch'il term Biosfera haja per la Val Müstair. Ins na possia mai dar si in num u ina marca actuala. Il term Biosfera portia blers turists e saja in element per sa differenziar dad auters parcs da natira, èsi vegnì argumentà.
Lavurar vid Masterplan
La suprastanza communala vul ussa lavurar vinavant vid il svilup da la Val Müstair. Quai cun il parc da natira "Biosfera Val Müstair". La Val Müstair duai daventar in lieu da natira e cultura che pussibilitescha era in svilup economic.
RR novitads 06:00