Tut ils gronds affars ed oravant tut quels en ils centers èn pronts per il Black Friday. Quai è quel di, che valia sco il cumenzament dals affars da Nadal nua ch'ils consuments chattan divers products per pretschs reducids.
En ils Stadis Unids exista el gia da ditg – durant ils ultims onns è el er vegnì scuvrì dals affars svizzers.
Empustar online – e survegnir la rauba ord la Val Müstair
Dal di che porta a bleras fatschentas ina da las pli grondas svieutas durant tut l’onn na profiteschan betg mo ils affars en ils centers, mabain era in en la Val Müstair: il shop online venova.ch.
Quai è in affar cun ragischs en il Tirol dal Sid che venda ses products sulettamain sur l’internet e quai cun success malgrà il lieu periferic. La decisiun dad insumma vegnir en la Val Müstair e stada intenziunada. Ch'il martgà Svizzer saja in martgà interessant manegia il manader da fatschenta, David Gluderer e quel martgà vul ins servir directamain ord la Svizra.
Affars virtuals na concurrenzeschan betg ils affars en val
La gronda tema ch’in tal affar pudess metter in malura las butias indigenas na saja betg sa verifitgada. Quai conferma la presidenta da l’Uniun da Mansteranza e Gastro Val Müstair, Gabriella Binkert Becchetti. Questa fatschenta na tangheschia betg il commerzi indigen ed ins haja fatg dapi l'avertura bunas experientschas cun il shop online.
Telesguard 17:40