L’october aveva la suprastanza communala decis da serrar il batschigl en il liber dal bogn cuvert da Puntraschigna. Quai sco mesira per spargnar energia. Gia là saja però stà cler, ch’ins veglia evaluar regularmain la situaziun e decider adina puspè da nov, uschia Nora Saratz-Cazin, la presidenta communala da Puntraschigna. Quai hajan ins fatg ed or da divers motivs decis da puspè avrir parzialmain quella part. Per l’ina demussia in studi da la Confederaziun che la situaziun a curta vista da la stgarsadad d’energia saja sa schluccada in zic e per l’autra stettian ils dis da festa cun blera glieud davant porta.
Senza la part dadora vegnin nus cun las frequenzas sur ils dis da festa al cunfin da las capacitads.
Avertura cun surveglianza
Las proximas duas emnas è pia puspè averta la part or en il liber. Trais giadas il di vegnia però mesirada la consumaziun d’energia, uschia la presidenta communala. Sin basa da quellas possian ins lura trair puspè ina decisiun il cumenzament da schaner. La mancanza d’energia saja in tema impurtant, e la vischnanca da Puntraschigna veglia ir ordavant cun bun exempel. Impurtant tenor la presidenta communala saja però, da prender decisiuns giustifitgadas.