Dals 13 da mars enfin ils 6 da zercladur eran serradas las portas dal motor turistic amez la vischnanca da Scuol – absolut naginas entradas. Ed ussa, suenter ils 6 da zercladur dastgan entrar mo 130 persunas empè da 320.
Tenor ils quints dals onns anteriurs van a perder uschia entradas da radund in milliun francs. Perquai ha il Bogn Engiadina Scuol inoltrà la dumonda per retschaiver quel import a fond perdu. La radunanza communala ha lieu ils 29 da zercladur.
Tenor infurmaziuns dal directur Claudio Duschletta n’è il bogn betg vegnì actualmain in stretgas causa la mancanza da daners, ma a lunga vista pudess quai tut tenor esser pussaivel senza l'agid da Scuol.
La vischnanca da Scuol paja mintg’onn in import da 1,85 milliuns vi da la gestiun dal bogn, quai per egualisar il quint annual. Cun questa mesira ins prevesa da segirar la gestiun ordvart impurtanta per il turissem en Engiadina Bassa.