Mintga trais onns vegn sanà e renovà il bogn Engiadina Scuol. Questa giada vegn renovà il cor dal bogn, numnadamain ils batschigls principals. Per radund 2 milliuns francs survegnan quels novs funs, novas plattinas e novas colurs, uschia il directur dal Bogn Engiadina Scuol, Claudio Duschletta. Questa renovaziun saja fitg impurtanta per restar attractiv. Da mantegnair l’infrastructura da basa ch’è 30 onns veglia, ma tuttina esser adina puspè innovativ saja ina gronda sfida. Tuttina na vegnia ina sbuvada dal stabiliment actualmain betg en dumonda, uschia Claudio Duschletta. Tras las renovaziuns regularas saja l’infrastructura en in bun stadi actual.
Las lavurs da renovaziun da quest onn duran fin la fin da zercladur. La fin da matg avra il Bogn Engiadina sias portas cun ina spierta reducida.