Per dretg d'urgenza ha la vischnanca exproprià terren en vischinanza da Bondo la fin d'avust. Radund 70 possessurs ed 8 purs èn stads pertutgads da questa mesira. Entaifer paucas uras han ins cumenzà a deponer il material da la bova giu da la Val Bondasca. L'emprima deponia è entant emplenida – cun radund 32'000 meters cubic material. Il terren da la deponia vegn proxima primavaira inverdì e puspè surdà als purs.
En la segunda deponia sa chattan radund 300'000 meters cubic material. Spazi ha ella però per radund 700'000 meters cubic. Plirs tschientmilli meters cubic sa chattan anc sin la muntogna e per quel material ston ins anc laschar plazza sin reserva. Ultra da quai è previs ina terza deponia. Il lieu e la grondezza da quella deponia èn anc en planisaziun.
La deponia resta visibla per l'avegnir
Tenor l'architect da cuntrada, Paolo Bürgi da Bellinzona, resta la gronda deponia era en l'avegnir bain visibla. Quella duess restar in monument per sa regurdar da la gronda devastaziun l'avust 2017.
Ils possessurs e purs vegnan indemnisads per la perdita da valur e la perdita da racolta. Il vitg da Bondo prevesa da realisar ina meglieraziun parziala.
RR novitads 06:00