Suenter ch'il chantun aveva anc ina giada examinà geologicamain il lieu da la bova tranter Ardez e Scuol, èsi stà cler che la via resta serrada per almain trais emnas. Suenter quintava il chantun da pudair avrir la via sin in vial. Las lavurs da siglientar, rumir e segirar la via s'avanzan uss dentant bain. Perquai èsi previs da puspè avrir la via la fin d'emna dals 18 e 19 da schaner.
Situaziun era instabila
Là nua che la bova è sa distatgada han geologs constatà gia avant Nadal, ch'i dat anc adina parts da crap en la paraid che n'èn betg stads stabils. Er in grip era anc periclità da crudar ed ha perquai stuì vegnir allontanà. Per part è quai capitar a maun e per part cun utensils spezials. Ina part dal grip è vegnì siglientà u sto anc vegnir siglientada. Ils geologs quintan ch'ina massa da radund 100 fin 150 meters cubics sto vegnir allontanada.
Sviament per autos e camiuns
Per vehichels sut 18 tonnas datti in sviament che va sur Ftan. Damai che la via è stretga, po il traffic dentant mintgamai charrar be en ina direcziun, ha declerà Jachen Kienz, schef dal district da l'Uffizi da construcziun bassa ad RTR, gia avant Nadal.
Vehichels pli grevs ston sviar la via a moda pli lunga e ston charrar sur il pass dal Reschen – Val Müstair – pass dal Fuorn.
500 meters cubics en via
Ils 23 da december a mezdi èn radund 500 meters cubics crappa sa distatgads radund 20 meters sur la via e crudads sin la via tranter Scuol ed Ardez. Sin in traject da radund 30 meters è la via vegnida bloccada. Sche la via è donnegiada, n'è anc betg cler. Las barrieras e palissadas da lain ch'eran avant maun èn dentant donnegiadas.
Intginas minutas avant la bova avevi gia dà singuls craps ch'eran crudads en via. Avant eran er las temperaturas stadas fitg variantas ed i aveva pluvì ferm. Blessads n'avevi dà nagins.
RTR novitads 14:00