Bovas en Val Müstair

Ina malaura venderdi saira ha pisserà per bovas en Val Müstair

Punt demolida d'ina bova a Fuldera. Bild in Lightbox öffnen.

Legenda da maletgs: Bovas en Val Müstair La punt demolida a Fuldera. I. Andri

In temporal fitg intensiv ha procurà per bovas en Val Müstair venderdi saira. Pervia da la plievgia fitg intensiva è vegnì giu bler material dal Piz Daint. Quai tenor infurmaziuns dal president communal da Val Müstair, Arno Lamprecht.

Impediments e donns

Il material è parzialmain arrivà sin la via dal Pass dal Fuorn. Il pass è perquai stà serrà durant tut la notg. A Tschierv è il Rom per part passà sur la riva ora, ma n’ha betg chaschunà gronds donns. A Fuldera percunter ha l’aual da la Val Ruina stratg davent la punt che collia Fuldera cun Fuldera Daint.

Era la via da velos tranter Fuldera e Valchava è serrada perquai ch'ina punt è demolida. En la Val Vau ha l'aua da Vau chaschunà donns vid l'enchaschament da l'ovra electrica. A Müstair hai dà donns d’aua en 2 hotels.

Ina bova a Samignun

Er en Samignun è vegnì giu ina bova la notg da venderdi sin sonda. Quai ha la Polizia chantunala confermà sin dumonda dad RTR. Perquai è la via tranter Vinadi e Spiessermühle stada serrada per motivs da segirtad.

RR Novitads 12:00