Siglir tar il cuntegn

Header

cuntegn

Engiadina Bunas cifras dal favrer egualiseschan nauschas dal december

Las scolas da skis en Engiadina fan ina mediocra bilantscha intermediara da la stagiun d’enviern 2015/16. Grazia a las cundiziuns da naiv il favrer, na duessi betg resultar in grond minus a la fin da la stagiun.

En cumparegliaziun cun ils ultims 5 onns vegnan a serrar fin uss tut las scolas da skis cun damain uras d‘instrucziun per la stagiun d’enviern actuala. Surtut ils dis sur festas, che vessan dad esser ils plis ferms, n’hajan betg purtà las cifras spetgadas, han confermà las scolas da skis da Scuol, Zuoz/La Punt, Schlarigna/San Murezzan/Samedan e Suvretta San Murezzan ad RTR. Dentant haja salvà la naiv crudada la fin da schaner las emnas fermas da vacanzas dal favrer.

audio
Mezdi: Engiadina - bilantscha da las scolas da skis
ord Actualitad dals 09.03.2016.
laschar ir. Durada: 4 minutas 18 Secundas.

Favrer cun cifras da record per Scuol

Surtut la scola da skis a Scuol po notar il favrer 2016 cifras sco anc mai, ha ditg il manader da la scola, Cla Neuhaus. En congual cun l’onn avant resulta sut il stritg in plus da 10 %.

A Zuoz han ins almain cuntanschì stgars las cifras da l’onn avant. Cuntent èn ins a Schlarigna cun in dumber da 250 fin 400 uffants al di en la scola da skis. Tuttina vegn probabel a resultar in minus la fin da l’enviern tar las scolas da skis da l'Engiadina. Quai causa il nausch cumenzament da la stagiun.

Clientella s’ha midada

Per accumplir er en avegnir ils giavischs dals giasts hajan ins dad ir sur ils cudeschs a reguard la purschida da las scolas. Las pretaisas s’han midadas fermamain ils ultims onns. Uschia è per exempel la scola da skis Suvretta San Murezzan vid in nov concept per porscher curs er sper la pista als clients.

Nus congualain las cifras cun quellas da l’onn passà, era in onn betg cuntentaivel.
Autur: Gudench Campell Manader scola da skis Zuoz / La Punt

Pliras stagiuns cun in resultat negativ na supporta nagina da las scolas da skis. A lunga vista hajan ins perquai da chattar soluziuns per envierns pli curts cun pauca naiv, ha suttastritgà il manader da las scola da skis Zuoz/La Punt, Gudench Campell.

Buna Pasca

Gronda speranza han uss tuts, che l’aura resta bella, e che la Pasca attira anc ina giada numerus sportist sin pista per egualisar sche pussaivel anc il minus dal december 2015.

Artitgels legids il pli savens