L'interpresa guardia enavos sin in bun onn da fatschenta, communitgescha la Bus e Services SA a chaschun da la radunanza generala. Ils bus da Cuira e da l'Engiadina han transportà 8,7 milliuns passagieras e passagiers l'onn passà. Quai èn 14% dapli che l'onn avant. Era il resultat finanzial saja sa meglierà marcantamain. Las entradas èn creschidas sin 23,2 milliuns francs ed i resulta ina pitschna perdita da bun 170'000 francs. Motivs per la perdita sajan cunzunt ils pretschs d'ieli auts.
Las cifras èn creschidas, ma na cuntanschan anc betg il nivel d'avant la pandemia. Il traffic public da Cuira saja cunzunt transport da pendularis e pendularias e da quels dettia pli paucs pervia dal home office. Meglier saja quai en l'Engiadina. Là è la cumpart da turistas e turists pli auta. Uss saja da prender en mira las sfidas dal futur, per exempel ina flotta persistenta e da defender la concessiun per l'Engiadina.
Dapli traffic public en la regiun da Cuira
La midada d’urari ha chaschunà en la regiun da Cuira las pli grondas midadas dapi l’introducziun da Transreno l’onn 1997. Ensemen cun l’Auto da posta e la Viafier retica è il concept da Transreno vegnì reelavurà. Per il bus da Cuira ha quai engrondì la rait da lingias sco er manà ad in urari pli spess e dapli colliaziuns directas. Per pussibilitar questa purschida ha la Bus e Service SA cumprà novs bus ed emploià 16 novs manischunzs e manischunzas.
Il futur duai esser persistent
Dapi il favrer 2022 testescha l’interpresa en l’Engiadina in bus cun motor electric. Ils resultats cuntenta fin uss. Il bus vegnia a frida bain cun las cundiziuns topograficas e climaticas da l'Engiadin’Ota. Il radius d’acziun saja bun da tutta aura e da tuttas temperaturas, be il lung temp da chargiar la battaria limiteschia anc la flexibilitad. Ina da las sfidas vegnia ad esser da midar la flotta e porscher in'infrastructura da chargiar.
Nova concessiun per l’Engiadina
Las concessiuns per la purschida da traffic public vegnan scrittas ora regularmain da la Confederaziun, dal chantun e da vischnancas per in temp limità. Quest onn è quai puspè il cas per la Engiadin’Ota e per il curs a Lugano, il «PalmExpress». La Bus e Service SA che gestiunescha il Bus Engiadina ha inoltrà in dossier da candidatura e quinta cun ina decisiun la fin da la stad.
Cifras da l’onn 2022
| Vehichels en servetsch da lingia | 54 |
| Collavuraturas e collavuraturs | 183 |
| Kilometers prestads | 3,6 milliuns |
| Passagiers e passagieras | 8,7 milliuns |
| Svieuta | 23,3 milliuns francs |