Siglir tar il cuntegn
cuntegn

Engiadina Butia da mobiglia serra sias portas suenter 30 onns

La WOMA SA na datti prest betg pli. Il possessur da l’affar a Samedan, n’ha betg chattà ina soluziun da successiun ideala. Uss vegn la butia da mobiglia e rauba da decoraziun liquidada. Las localitads prenda a fit l’affar danais Jysk.

 Max Gygax.
Legenda: Max Gygax sto uss svidar e vender ora tut l’inventar existent. La surdada da las localitads è prevesida per ils 29 avrigl 2019. RTR, Anna Caprez

Per Max Gygax e sia dunna Christine na saja la decisiun insumma betg stada simpla. Gugent avess il pèr surdà uss suenter la pensiun lur affar en mauns che tgiran vinavant lur filosofia. Dentant n’haja el simplamain betg chattà ina soluziun.

La decisiun è stada in cumbat fitg emoziunal !
Autur: Max Gygaxaffarist WOMA SA Samedan

L’atun passà aveva la butia da mobiglia a Samedan anc festivà il giubileum da 30 onns Woma. Là anc cun l’opiniun en mira ch’ina interpresa indigena dal Puschlav surprendess l’affar. L’ultim mument n’haja dentant betg vulì esser, deplorescha l’affarist da 65 onns.

Vendita online crescha

Max Gygax ha dentant er chapientscha ch’ins ha respect da surprender actualmain in affar. Er il sectur da mobiglia è expost fermamain a la concurrenza tras la distribuziun online. Ed il cumbat sin il martgà saja dir. Avant bun sis onns fascheva la butia anc ina svieuta da 2,3 milliuns. Suenter il crash da l’euro saja ì enavos marcant. L’onn passà ha la butia anc gì ina svieuta da 1,6 milliuns. Il trend mussia dentant puspè ensi, uschia l’affarist da Samedan.

Vendita cumpletta

Cun dar las localitads da l’edifizi en la zona industriala da Cho d’Punt a Samedan a l’interpresa danaisa Jysk, ha Max Gygax uss da svidar e vender ora tut l’inventar existent. La surdada da las localitads è prevesida per ils 29 d'avrigl 2019. El fa quint che la nova filiala da Jaysk avra sias portas suenter ina renovaziun la stad 2019.

RR actualitad 17:00