Dapi che la butia da secondhand exista, sa chattava quella al medem lieu en in’anteriura falegnamaria a Scuol. L’onn passà alura la nauscha nova. Il bajetg nua che la butia era sa chasada, è vegnì vendì per construir abitaziuns. Las 17 dunnas, per gronda part mammas che lavuran a basa voluntara en la Lindorna, han sinaquai stuì prender per mauns la sfida da chattar novas localitads. E quai gist era durant in temp nua che las immobiglias eran ed én fitg stgarsas en l’Engiadina Bassa.
Soluziun a Vulpera
Suenter in mez onn tschertga intensiva han las lindornas alura gì fortuna. Ellas han numnadamain chattà novas localitads a Vulpera. Quai grazia era ad in sforz finanzial d’ina da lur commembras. Era sche Vulpera n’é betg pli uschia central sco lur vegl lieu a Scuol – èn tut las lindornas fitg cuntentas da la midada. Oravant tut era perquai che gist visavi da la nova butia sa chatta ina plazza da giugar ed in bogn avert. In aspect fitg impurtant per las lindornas. Pervia entant che tschertas dad ellas lavuran, fan autras la tgira da pops. In concept che funcziuna gia dapi trais decennis uschia, e po ussa cun la midada puspè ir vinavant.