Engiadina - Butia nova per la claustra Müstair

Là nua che la scolina sa chattava en la claustra vendan ussa las mungias ervas, savuns, devoziunalias, cartulinas e bler auter. Sut la batgetta da l’architect Dieter Jüngling han plirs mastergnants indigens engrondì e transfurmà la butia veglia e la scolina en in nov local da vendita e biro d’infurmaziun turistica.

Durant l’inauguraziun ha mussà la priura Domenica grond plaschair vi da la butia nova. Ella era sezza blers onns mussadra da scolina en quellas localitads. Quai era in lieu fitg impurtant per il contact tranter ils dus munds, quel dadens ils mirs da la claustra e quel dador ils mirs. Quella funcziun vegn mantegnida vinavant en furma da la butia. Quai che è tuttafatg en il senn da l’ospitalitad benedictina, di la priura.