Siglir tar il cuntegn

Header

cuntegn

Engiadina Butin da 25’000 francs a Tschierv

En Val Müstair è vegnì rut en ed engulà en dus lieus la notg sin sonda. Quai scriva la Polizia chantunala.

Ils laders èn stads activs en la notg da venderdi sin sonda.

Butia e bancomat a Tschierv

A Tschierv han nunenconuschents sfratgà in bancomat. Per far quai èn els rut en la notg da venderdi sin sonda en la butia da mangiativas a Plaun Grond ed han taglià si il bancomat da dadensvart cun ina rudella da tagliar. Lura han els engulà dus cassettas da raps cun en tut 25’000 francs.

Els han causà donns materials per passa 10’000 francs. Ils utensils da delict ed inventar da la butia ha la polizia chattà en il Rom.

Lavuratori a Valchava

Sonda a bun’ura tranter las 4:00 e las 6:00 èsi vegnì rut en era en il lavuratori da l’uffizi da construcziun bassa a Valchava. L’emprim han ils laders empruvà da rumper si la porta da service da la porta rullanta. Pervi che quai n’ha betg funcziunà, han els rut ina fanestra e sun rivads uschia en il edifizi.

Tge ch’els han engulà n’è anc betg enconuschent, scriva la polizia.

RR novitads 17:00

Artitgels legids il pli savens