Siglir tar il cuntegn

Header

cuntegn

Campiunadi da freestyle 2025 Glisch verda per infrastructura da Big Air

Il cussegl communal da San Murezzan ha deliberà in credit dad 1,7 milliuns francs plus la taglia sin la plivalur necessaria per la construcziun da la schanza a Champfér.

L'infrastructura da Big Air duai vegnir construida sin il prà Grevas a Champfér en furma d'ina infrastructura temporara. Ils custs vegnan ad esser tar radund 1,8 milliuns francs. Ils organisaturs dal campiunadi mundial da freestyle 2025 han perquai dumandà la vischnanca da San Murezzan sco vischnanca da domicil per in tal credit.

Sin proposta dal cusseglier communal Fritz Nyffenegger è l'import vegnì reducì sin 1,7 milliuns francs plus la taglia sin la plivalur necessaria. Motiv è che la societad ch'organisescha l'occurrenza è suttamessa a la taglia sin la plivalur.

Discussiuns areguard il lieu

Avant ch'il cussegl communal ha dentant dà glisch verda per la construcziun da l'infrastructura da Big Air hai dà ina discussiun davart il lieu. Uschia era oriundamain en discussiun da construir l'infrastructura ubain tar l'anteriura schanza da siglir a San Murezzan ubain sin il prà da polo a San Murezzan Bagn. Ils organisaturs han infurmà il cussegl communal che l'areal a Champfér saja il meglier adattà, schebain ch'i saja da spetgar cun recurs. Or da mancanza da temp e budget sajan ils differents lieus dentant betg vegnids evaluads en detagl. Sche l'areal a Champfér n'avess betg da funcziunar, duai l'areal tar l'anteriura schanza da siglir vegnir tractà sco plan B.

Il campiunadi mundial da freestyle 2025 vegn ad avair lieu dals 15 fin 28 da mars, previs èn 28 decisiuns en 14 disciplinas. Ils organisaturs fan quint cun 1'200 atletas ed atlets e cun radund 70'000 aspectaturas ed aspectaturs.

audio
Per tadlar: curt e cumpact
ord RTR Audio dals 26.08.2022.
laschar ir. Durada: 1 minuta 22 Secundas.

RTR novitads 06:00

Artitgels legids il pli savens

Scrollar a sanestra Scrollar a dretga