Siglir tar il cuntegn

Header

Navigaziun

Legenda: Tadlar il audio Saira: San Murezzan – Paucas schanzas per candidatura freestyle WM 2025. Durada 02:56 minutas.
Or da Actualitad dals 02.05.2019.
cuntegn

Campiunadi mundial freestyle Paucas schanzas per candidatura 2025 da l'Engiadin'Ota

Ils organisaturs enturn la candidatura engiadinaisa dovran anc temp per segirar la finanziaziun da 12 milliuns francs. Ultra da quai è vegnida inoltrada tar la FIS l’ultim mument la candidatura da la Russia.

Durant las ultimas emnas ha il comité enturn Daniel Schaltegger pudì persvader tant la destinaziun turistica sco er las pendicularas d’Engiadin’Ota da la candidatura per in campiunadi mundial da freestyle. Er ina gronda part da las vischnancas da la Regiun Malögia hajan dà lur consentiment da finanziar ils 4 milliuns che han da vegnir da la regiun.

Pitgar portas

Per survegnir ils ulteriurs raps dovri uss temp, uschia Schaltegger. Dal chantun sco er da la Confederaziun possia ins far quint cun mintgamai 4 milliuns francs. El quinta dentant cun in process politic ch'i dura almain 12 fin 18 mais. Uschia saja er impussibel d’inoltrar il dossier per la candidatura tar la FIS quest atun.

Effect da surpraisa

Surprais èn ils responsabels en l'Engiadina stads da l’infurmaziun da l’associaziun federala da la Russia. Quella ha inoltrà tar la FIS curt avant la data da scadenza, ina candidatura uffiziala per il campiunadi mundial freestyle 2025. Fin avant paucs dis era San Murezzan l’unic interessent en cursa.

Tenor Daniel Schaltegger èn perquai las schanzas da tuttina organisar in campiunadi mundial gia l’onn 2025 anc tar pli pauc che 5%. La finamira restia dentant la medema, numnadamain dad attrair cun mastranzas mundialas da Freestyle in nov public giuven en l'Engiadina.

RR novitads 10:00